ممبئی: بالی وڈ کنگ شاہ رخ خان کی نئی فلم ’جوان‘ کے ٹریلر کا مداحوں کو بے صبری سے انتظار ہے اور اب یہ خبر سامنے آئی ہے کہ اسے ہالی وڈ اسٹار ٹام کروز کی فلم ’مشن امپاسیبل 7‘ کے ساتھ سینما گھروں میں دکھایا جائے گا۔
ہالی وڈ بلاک بسٹر سیریز کی فلم ’مشن امپاسیبل 7‘ 12 جولائی کو دنیا بھر میں ریلیز کی جائے گی اور ’جوان‘ کا ٹریلر بھی اسی موقع پر دیکھا جاسکے گا۔
بھارتی میڈیا نے اپنے ذرائع سے دعویٰ کیا ہے کہ ’جوان‘ کا آفیشل ٹریلر ہالی وڈ فلم کے درمیانی وقفے میں پیش کیا جائے گا، فلم میکرز نے اس خبر پر ابھی تک اپنا ردعمل نہیں دیا ہے۔
ایٹلی کی ہدایت کاری میں بننے والی فلم ’جوان‘ شاہ رخ خان کا رواں برس کا دوسرا بڑا پروجیکٹ ہے، اس سے قبل ’پٹھان‘ نے تاریخی کامیابی حاصل کی ہے۔
سدھارتھ آنند کی ڈائریکشن میں بننے والی فلم ’پٹھان‘ نے پوری دنیا سے ایک ہزار کروڑ سے زائد کا تاریخ ساز بزنس کیا تھا۔
’جوان‘ میں کنگ خان کے ساتھ نیانترا اور وجے سیتھوپتی نے بھی اہم کردار ادا کیے ہیں اور اسے رواں برس 7 ستمبر کو ریلیز کیا جائے گا۔
