ریاض: سعودی عرب کی یمن سے متصل سرحد پر گشت کے دوران حوثیوں کے ڈرون حملے میں زخمی ہونے والے بحرین کی فوج کے اہلکار نے دو دن بعد دوران علاج جام شہادت نوش کرلیا۔
سعودی میڈیا کے مطابق حوثیوں کے ڈرون حملے میں دو روز قبل بحرین کی فوج کے دو اہلکار جاں بحق اور متعدد زخمی ہوگئے تھے جن میں سے ایک آج اسپتال میں دم توڑ دیا اس طرح ہلاکتوں کی مجموعی تعداد 3 ہوگئی۔
آج اسپتال میں دم توڑنے والے بحرینی فوجی کی شناخت آدم سلیم نصیب کے نام سے ہوئی ہے جو فرسٹ وارنٹ آفیسر تھے۔ ان کی تدفن سرکاری اور فوجی اعزاز کے ساتھ کردی گئی۔
اب بھی چند زخمی فوجی اہلکار اسپتال میں زیر علاج ہیں تاہم بحرین کی حکومت نے زخمیوں کی تعداد نہیں بتائی تھی۔
یاد رہے کہ حوثیوں کے مبینہ ڈرون حملے کا واقعہ اُس وقت پیش آیا ہے جب یمن میں جنگ بندی ہے اور فریقین ایک دوسرے پر حملے نہیں کر رہے اور حال ہی میں حوثیوں کے ایک وفد نے سعودی عرب کا دورہ بھی کیا تھا۔
سعودی عرب کی قیادت میں عرب اتحاد نے 2015 میں حوثیوں کے خلاف یمن کی بین الاقوامی طور پر تسلیم شدہ حکومت کی حمایت میں فوجی مداخلت کی تھی لیکن فی الحال متحارب فورسز کے درمیان جنگی بندی ہے۔
