اسلام آباد: چیئرمین پاکستان تحریک انصاف (پی ٹی آئی) بیرسٹر گوہر نے کہا ہے کہ بشریٰ بی بی کی رہائی کسی بھی ڈیل کا نتیجہ نہیں ہے۔
چیئرمین پی ٹی آئی بیرسٹر گوہر نے میڈیا سے گفتگو کرتے ہوئے کہا کہ بشریٰ بی بی نے سختیاں برداشت کیں۔ ان کی رہائی پر کسی بھی قسم کی ڈیل کی تردید کرتا ہوں۔ اگر کوئی ڈیل ہوئی ہوتی تو بشریٰ بی بی 9 ماہ جیل میں نہ گزارتیں۔
انہوں نے کہا کہ بانی پی ٹی آئی کی بھی عدالت کے ذریعے رہائی ہو گی۔ جبکہ تمام کارکنوں کو بشریٰ بی بی کی رہائی کی مبارکباد دیتا ہوں۔ اب تک جتنے مقدمات بنائے گئے تھے بشری بی بی نے سب مقدمات کا سامنا کیا۔
بیرسٹر گوہر نے کہا کہ بشریٰ بی بی کا توشہ خانہ سے دور دور تک کوئی تعلق نہیں تھا۔ اور یہ مقدمات صرف بشریٰ بی بی کو جیل میں رکھنے کا بہانہ تھے۔ یہ لوگ جتنی کوشش کرلیں عوام بانی پی ٹی آئی کے ساتھ ہیں۔
انہوں نے کہا کہ پی ٹی آئی میں کوئی فارورڈ بلاک نہیں ہے۔ اور بانی پی ٹی آئی کی ہدایت پر آگے بڑھ رہے ہیں۔ پی ٹی آئی متحد ہے۔ بشریٰ بی بی کے باہر آنے سے بہت سے مسائل حل ہوں گے۔
