اسلام آباد: اسٹیٹ بینک آف پاکستان کا کہنا ہے کہ ماہ نومبر میں کرنٹ اکانٹ خسارہ 27 کروڑ 60 لاکھ ڈالر رہا ہے۔ مرکزی بینک کے اعداد و شمار کے مطابق نومبر کا کرنٹ اکانٹ خسارہ گزشتہ 19 ماہ کے دوران سب سے کم رہا ہے۔ بینک کے مطابق گزشتہ سال نومبر کے مقابلے میں یہ خسارہ 86 فیصد کم ہے کہ جس میں ایک ارب 92 ڈالر کا خسارہ ہوا تھا جبکہ اکتوبر کے مقابلے میں کہ خسارہ تقریبا 56 فیصد کم ہے۔ اعلامیے کے مطابق رواں سال کے ابتدائی 5 ماہ میں کرنٹ اکانٹ خسارہ 3 اعشاریہ1 ارب ڈالر رہا جبکہ گزشتہ مالی سال کے اسی عرصے کے دوران یہ خسارہ 7 ارب 20 کروڑ ڈالر تھا۔ بینک کے مطابق اس خسارے میں کمی کی وجہ درآمدات میں کمی ہے جو اس عرصے کے دوران 16 فیصد کم رہیں یعنی اس عرصے میں صرف 4 ارب 80 کروڑ ڈالر مالیت کی درآمدات کی گئیں۔ اس حوالے سے ایکسپریس سے بات کرتے ہوئے پاک کویت انوسٹمنٹ کمپنی کے ہیڈ آف ریسرچ سمیع اللہ طارق کا کہنا تھا کہ موجودہ معاشی حالات کے پیش نظر حکومت کے پاس اور کیا طریقہ رہ گیا تھا ماسوائے اس کے کہ وہ کم از کم درآمدات کم کرے۔ ان کا مزید کہنا تھا کہ اچھی بات یہ ہوئی کہ اس ماہ کے دوران برآمدات سے اور ترسیلات زر کے نتیجے میں چار ارب 35 کروڑ ڈالر کی آمدنی ہوئی جبکہ نومبر کے دوران 4 ارب 26 کروڑ ڈآلر کی درآمدات کی گئیں اس سے یہ ظاہر ہوتا ہے کہ بیرونی ادایگیوں کے معاملے میں معمولی سی بہتری آئی ہے اور ڈیفالٹ ہونے کا خطرہ کچھ کم ہوا ہے۔
