وفاقی وزیر برائے منصوبہ بندی احسن اقبال نے کہا ہے کہ دو صوبوں میں الیکشن سے متعلق سپریم کورٹ کے فیصلے نے پاکستان کے سیاسی نظام میں مستقل بحران کی بنیاد رکھ دی۔نجی ٹی وی چینل میں (ن) لیگ کے سینئر رہنما کا کہنا تھا کہ اگر پنجاب اور کے پی میں پی ٹی آئی ہار جائے گی تو کیا وہ وفاق کو الزام نہیں دے گی؟ انہوں نے کہا کہ اگر دونوں صوبوں میں ہماری حکومتیں ہوں گی تو اگلے الیکشن کون مانے گا؟ دو صوبوں کے الیکشن موجودہ مردم شماری پر اور باقی دو صوبوں اور ملک کے الیکشن نئی مردم شماری پر کیسے ہوں گے؟ احسن اقبال نے عمران خان کا نام لیے بغیر کہا کہ جو شخص ہمیں رول آف لا کا درس دیتا تھا اب رول آف لا سے بھاگتا پھرتا ہے۔
