تحریک انصاف کا آج چوتھے روز کا لانگ مارچ گوجرانوالہ میں چند دا قلعہ کے مقام پر اختتام پذیر ہو گیا ہے۔ کل منگل کو پانچویں روز اسی جگہ سے لانگ مارچ کا آغاز ہو گا۔ پاکستان تحریک انصاف نے 28 اکتوبر کو لاہور کے لبرٹی چوک سے اپنے لانگ مارچ کا آغاز کیا۔ اس سے قبل شرکا سے خطاب میں عمران خان کا کہنا تھا کہ کہ لوگوں کے جذبے کی وجہ سے ہم روز 10 سے 12 کلومیٹر آگے نہیں بڑھ سکتے، عوام انصاف کے انقلاب کو دیکھ رہے ہیں۔ عمران خان نے چیف الیکشن کمشنر سکندر سلطان راجا پر 10 ارب روپے ہرجانے کے دعوے کا اعلان کردیا ہے۔ چیف الیکشن کمشنر کو مخاطب کرتے ہوئے عمران خان نے کہا کہ تم بڑا 2 نمبر آدمی کبھی الیکشن کمیشن میں نہیں بیٹھا، اس بدنیت آدمی نے مجھے نااہل قرار دیا تھا، اسلام آباد ہائی کورٹ نے میری نااہلی ختم کردی ہے، مجھے معلوم ہے کون اس کی پشت پناہی کررہا ہے کیونکہ اس گیڈر میں تو دم ہی نہیں تھا۔ عمران خان نے کہا کہ میں سکندر سلطان راجا پر 10 ارب روپے کے ہرجانے کا دعوی کروں گا کہ اس نے چوروں کو خوش کرنے کے لیے فارن فنڈنگ کیس اور توشہ خانہ میں میرا نام لیا۔ اس نے میری دیانتداری پر سوال اٹھایا، جب بھی عدالت میں میری ایک بھی غیر قانونی چیز نکلی تو فیصلے کا انتظار کرنے کے بجائے خود ہی چھوڑ دوں گا۔ سابق وزیر اعظم نے کہا کہ میں ان لوگوں کو پیغام دے رہا ہوں جنہوں نے چوروں کے ٹولے کو ہم پر مسلط ہونے دیا کہ اللہ کا واسطہ ہے قوم کی آواز سن لیں، شہباز شریف کے پاس کوئی اختیار نہیں، ڈگی میں چھپ کر ملاقات کے لئے جانے والے سے کیا بات کی جاسکتی ہے، شہباز شریف نے ساری زندگی کیا کیا ہے؟ وہ طاقتور کے جوتے پالش اور کمزور کو دباتا ہے۔ میں اسے پیغام دے رہا ہوں جنہوں نے تمہیں یہاں بیٹھنے کی اجازت دی۔
