اسٹار کڈ ہونے سے کام نہیں ملتا بلکہ پرفارم کرنے کی اہلیت ضروری ہے اونتیکا دسانی

بھارتی ویب سیریز متھیا میں ریحا راج گرو کا کردار ادا کرنے والی اونتیکا دسانی کا کہنا ہے کہ بھاگیاشری کی بیٹی ہونے سے کام نہیں ملتا۔ بھارتی میڈیا کی رپورٹ کے مطابق انہوں نے کہا کہ پرفارم کرنے کی اہلیت ہونے کے ساتھ ساتھ کردار میں خود کو فٹ کرکے پیش کرنے سے کام ملتا ہے۔ ان کا کہنا تھا کہ کام نہ ملنے کی وجہ اقربا پروری کی نہ ختم ہونے والی بحث ہے۔ فلم انڈسٹری میں آنے سے قبل بزنس اور مارکیٹنگ کی ڈگریاں حاصل کیں اور کارپوریٹ سیکٹر میں نوکری بھی کی۔ سینئر اداکارہ بھاگیاشری کی بیٹی نے کہا کہ اداکاری میں آنے کا خیال میرے ذہن میں پہلے سے موجود تھا لیکن میں نے خود کو حالات پر چھوڑ دیا۔ اپنے دورہ لکھنو میں گفتگو کرتے ہوئے انہوں نے کہا کہ میں نے اپنی پڑھائی میں کافی محنت کی اور کالج میں ٹاپ کیا جس کے بعد اعلی تعلیم کے لیے لندن گئی اسکالرشپ حاصل کی۔ جس کے بعد تین برس کارپوریٹ سیکٹر میں ملازمت کی۔ اداکاری میں قسمت آزمائی کے حوالے سے ان کا کہنا تھا کہ میں ٹھیک طور پر اپنا کام کررہی تھی لیکن اپنے کام سے بہت زیادہ خوش نہیں تھی، میرے بھائی اداکار ابھیمانیو دسانی نے مجھے کہا کہ کچھ ورکشاپ میں شرکت کرو۔