برطانوی شاہی خاندان کی بہو، سابق امریکی اداکارہ میگھن مارکل کی میٹ گالا میں شرکت نہ کرنے کی وجہ سامنے آگئی۔ بین الاقوامی میڈیا رپورٹ کے مطابق، ڈچز آف سسیکس نے رواں سال اپنے شوہر شہزادہ ہیری کے ساتھ میٹ گالا میں شرکت کرنے سے گریز اس لیے کیا کیونکہ وہ شاہ چارلس کی تاجپوشی کی تقریب سے قبل میڈیا کی غیر ضروری توجہ نہیں حاصل کرنا چاہتیں۔ اس حوالے سے رابطہ عامہ کے ایک ماہر روشیل وائٹ کا کہنا ہے کہ اس ہفتے کے آخر میں شاہ چارلس کی تاجپوشی کی تقریب کے علاوہ شہزادہ آرچی کی سالگرہ بھی ہے اور شہزادہ ہیری برطانیہ جا رہے ہیں تو کچھ سیکیورٹی کے مسائل بھی ہیں، میرے خیال میں اس صورتحال کے پیشِ نظر میگھن مارکل نیخود کو میڈیا سے دور رکھنے کا فیصلہ کیا ہے۔ انہوں نے کہا کہ میٹ گالا کے فیشن، خوبصورت ملبوسات اور مشہور شخصیات کے بارے میں ہے، اس لیے اگر میگھن اور ہیری دونوں میں سے کوئی ایک بھی شرکت کرتا تو تقریب میں تمام تر توجہ ان دونوں کی جانب مبذول ہوجاتی اور میڈیا پر بھی ہلچل مچی ہوئی نظر آتی۔ انہوں نے مزید کہا کہ مجھے لگتا ہے کہ یہ اقدام ممکنہ طور پر اسٹریٹجک تھا یعنی اس کے لیے شاہی جوڑے نے اپنی ٹیم کی ساتھ مل کر پہلے سے ہی منصوبہ بندی کر رکھی تھی۔ اس حوالے سے ایک اور رابطہ عامہ کے ماہر اینڈی بار نے اپنی رائے کا اظہار کرتے ہوئے کہا کہ میگھن مارکل رابطہ عامہ نے شاہی محل سے کچھ اسباق سیکھ لیے ہیں لہذا اس بار انہوں نے شاہ چارلس کی تاجپوشی کی تقریب سے قبل مکمل خاموشی اختیار کرلی ہے۔
