پاکستان تحریک انصاف کے سابق رہنما عمران اسماعیل، محمود مولوی کے ہمراہ میڈیا سے گفتگو کرتے ہوئے فواد چودھری نے کہا کہ پی ٹی آئی کی سابقہ لیڈرشپ سے گفتگو ہوئی ہے اور شاہ محمود قریشی سے بھی تفصیلی ملاقات ہوئی۔ ہمارا ماننا ہے پاکستان کو مستحکم حل کی طرف جانا ہے۔ ہم حل کی طرف جائیں گے، یہ مشکل وقت ہے۔ انہوں نے کہا کہ یہ کسی طور ممکن نہیں پاکستان ڈیمو کریٹک موومنٹ (پی ڈی ایم) حکومت کو کھلا چھوڑ دیں اور آصف زرداری، نواز شریف اور فضل الرحمان کو کھل کھیلنے کا موقع دے دیا جائے، کیوںکہ یہ ملک کا بحران بڑھائیں گے۔ سابق وفاقی وزیر نے بتایا کہ ان کی پی ٹی آئی چھوڑنے والے دیگر افراد کے ہمراہ پی ٹی آئی کی لیڈرشپ اسد عمر و دیگر سے ملاقات ہوئی جبکہ شاہ محمود قریشی سے جیل میں بات چیت ہوئی۔ اپنی بات کو جاری رکھتے ہوئے ان کا کہنا تھا کہ پاکستان میں بے یقینی کی کیفیت ہے جس کی ذمہ دار پی ڈی ایم ہے اور ملک کو اس کے سہارے نہیں چھوڑا جاسکتا۔ مردم شماری کے مطابق ملک میں 25 کروڑ لوگ ہیں اور اتنے سارے افراد کو نواز شریف، آصف زرداری اور فضل الرحمان کے آسرے پر نہیں چھوڑ سکتے۔ فواد چودھری نے کہا کہ ان کی دیگر ساتھیوں کے ہمراہ پی ٹی آئی کی قیادت سے اچھی ملاقات رہی۔ توقع ہے پی ٹی آئی اور اس سے علیحدہ ہونے والے سیاسی رہنما آپس میں ملکر پاکستان کو مسائل کے مستقل حل کی جانب لے جائیں گے۔ فواد چودھری نے 9 مئی کو عمران خان کی گرفتاری کے بعد رونما ہونے والے واقعات پر ہونے والی گرفتاریوں کی جانب اشارہ کرتے ہوئے کہا کہ جو لوگ کسی قصور کے بغیر جیلوں میں گئے انہیں رہا ہونا چاہیے۔ جو کچھ ہوا وہ بہت افسوسناک تھا اور وہ ہماری ہی ذمہ داری تھی۔
