پاکستانی معروف اداکارہ، مزاح نگار، گلوکارہ اور ڈرامہ نگار بشری انصاری نے سوشل میڈیا پر سمندری طوفان بپرجوائے سے متعلق گردش کرتی افواہوں سے باز رہنے کی درخواست کی ہے۔ فوٹو اینڈ ویڈیو شیئرنگ پلیٹ فارم انسٹاگرام پر گزشتہ سہ پہر انسٹا پوسٹ شیئر کرتے ہوئے اداکارہ نے سمندری طوفان بپرجوائے سے متعلق سوشل میڈیا پر گردش کرتی خبروں کو افواہیں قرار دے دیا۔ اداکارہ نے سمندر کے قریب واقع عمارت سے ویڈیو شیئر کرتے ہوئے کہا ہے کہ سمندر کافی حد تک چڑھ گیا ہے تاہم آس پاس کی عمارتیں محفوظ ہیں۔ اداکارہ نے مداحوں سے درخواست کی ہے کہ یوٹیوب پر گردش کرتی جھوٹی خبروں پر یقین نہ کریں اور دعائیں کرتے رہیں، ٹینشن نہ پھیلائیں اور افواہوں پر بھی کان نہ دھریں۔ سب ٹھیک ہوگا انشا اللہ۔ دوسری جانب مذکورہ ویڈیو میں اداکارہ کو کہتے ہوئے سنا جاسکتا ہے کہ اس وقت شام کے 6 بجے ہیں اور ہم سب بالکل ٹھیک ہیں، براہ کرم یوٹیوبرز کی باتوں پر دھیان نہ دیں۔ میں خود پریشان تھی، جیسا کہ کہا جارہا تھا کہ سمندر 40 فٹ ہائی ٹائیڈ ہوگیا ہے ایسا فی الحال کچھ نہیں ہے اور ہم سب خیریت سے ہیں۔ انہوں نے مزید کہا کہ ہم نے حفاظتی انتظامات کے پیش نظر بیسمنٹ سے گاڑیاں نکال کر باہر کھڑی کر دی ہیں، حکومتی انتظامیہ نے بھی حفاظتی انتظامات کرتے ہوئے پمپس لگادیئے ہیں تا کہ ہنگامی صورتحال سے نمٹا جاسکے۔ انہوں نے شہر میں جگہ جگہ ہونے والی کھدائی پر تشویش کا اظہار کرتے ہوئے کہا کہ بارش تو ہوگی لیکن جب بارش ہوگی تو ان گھڑوں میں پانی جمع ہوجائے گا جس سے شہریوں کو پریشانی ہوسکتی ہے۔ انہوں نے یہ بھی کہا کہ کچھ اضلاع میں صورتحال خراب ہوسکتی ہے تاہم شہر کراچی اللہ کے کرم سے بالکل محفوظ ہے۔
