پاکستان ویمن کرکٹ ٹیم کی کھلاڑی ناہیدہ خان نے انٹرنیشنل کرکٹ سے ریٹائرمنٹ کا اعلان کر دیا ہے۔ ناہیدہ خان کا بین الاقوامی کیریئر 14سال پر محیط رہا، انہوں نے7 فروری 2009 کو سری لنکا کے خلاف بنگلادیش میں اپنا پہلا ون ڈے انٹرنیشنل کھیلا تھا۔ ناہیدہ خان کو یہ اعزاز حاصل ہے کہ وہ انٹرنیشنل کرکٹ میں پاکستان کی نمائندگی کرنے والی واحد خاتون کرکٹر ہیں جن کا تعلق بلوچستان سے ہے۔ انہوں نے 120 انٹرنیشنل میچوں میں پاکستان کی نمائندگی کرتے ہوئے 2014 رنز بنائے اور ایک وکٹ حاصل کی۔ انہیں ایک ون ڈے انٹرنیشنل میچ میں سب سے زیادہ کیچز کرنے کا اعزاز بھی حاصل ہے، ناہیدہ خان نے 2018 میں سری لنکا کے خلاف دمبولا میں چار کیچ لیے تھے وہ میچ پاکستانی ٹیم 94 رنز سے جیتی تھی۔ ناہیدہ خان نے 50 اوورز کے 3 عالمی کپ مقابلوں 2013 ، 2017 اور 2022 اور 4 ٹی ٹوئنٹی ورلڈ کپ 2012، 2014، 2016 اور 2018 میں بھی پاکستان کی نمائندگی کی۔ بلوچستان سے تعلق رکھنے والی ناہیدہ خان نے کرکٹ سے اپنی وابستگی برقرار رکھتے ہوئے کوچنگ کا شعبہ اختیار کیا اور حال ہی میں انہوں نے پاکستان کپ ویمنز کرکٹ ٹورنامنٹ میں بلاسٹرز کی اسسٹنٹ کوچ کی حیثیت سے ذمے داری نبھائی، اس سے قبل انہوں نے مارچ میں ہونے والی ویمنز لیگ میں ایمازون ٹیم کے ہیڈ کوچ توفیق عمر کی اسسٹنٹ کوچ کے طور پر بھی کام کیا تھا، ان نمائشی میچوں میں ایمازون دو ایک سے فاتح رہی تھی۔ ناہیدہ خان کا کہنا ہے کہ انہیں اپنے کیریئر میں جو بھی سپورٹ ملی ہے اس پر وہ بہت خوش ہیں، وہ اپنی فیملی، ساتھی کھلاڑیوں، کوچز اور پاکستان کرکٹ بورڈ کا شکریہ ادا کرنا چاہتی ہیں، جنہوں نے ان کی حوصلہ افزائی کی اور ان کی صلاحیتوں پر بھروسہ کیا، وہ اپنے مداحوں کا بھی شکریہ ادا کرنا چاہتی ہیں جنہوں نے ان کے کیریئر میں ہمیشہ ساتھ دیا۔ پاکستان کرکٹ بورڈ کی ویمنز ونگ کی سربراہ تانیہ ملک کا کہنا ہے کہ پاکستان میں خواتین کرکٹ کے لیے ناہیدہ خان کی خدمات ہمیشہ یاد رہیں گی، ان کی مہارت، حوصلہ مندی اور کھیل سے ان کی جنون کی حد تک محبت اور لگن مثالی ہے، یہ دیگر کھلاڑیوں کے لیے بھی مثال ہے کہ وہ ناہیدہ خان کو دیکھ کر کس طرح آگے بڑھ سکتی ہیں۔ تانیہ ملک نے کہا ہے کہ ناہیدہ خان ریٹائرمنٹ کے بعد مستقبل میں جو بھی کرنا چاہیں گی ہماری نیک تمنائیں ان کے ساتھ ہیں۔
