نیپال نے بالی ووڈ فلم آدی پورش کے سوا دیگر ہندی فلموں کی ملک میں نمائش پر سے پابندی اٹھالی ہے۔ واضح رہے کہ فلم آدی پورش میں متنازع ڈائیلاگ کی وجہ سے نیپال میں اس کے خلاف تنازع پیدا ہوگیا تھا۔ اس حوالے سے بھارتی میڈیا کا کہنا ہے کہ چند روز قبل عائد کی گئی پابندی جمعہ کو نیپالی حکومت نے اٹھا لی۔ تاہم فلم آدی پورش کی اسکریننگ پر پابندی برقرار ہے۔ اب نیپالی دارالحکومت کٹھمنڈو کے بہت سے سنیما گھروں پر آدی پورش کے علاوہ دیگر ہندی فلموں کی نمائش شروع ہوگئی ہے۔ اس سے قبل جمعرات کو پتن ہائیکورٹ کے سنگل بنچ کے جج دھیر بہادر چند نے ایک مختصر حکم نامے میں کہا تھا کہ جن فلموں کی نمائش کی اجازت لی گئی ہے ان کی نمائش پر پابندی نہیں لگائی جاسکتی۔
