راولپنڈی؛ کمسن طالبعلم سے اسکول میں زیادتی، وین ڈرائیور گرفتار

راولپنڈی: تھانہ ویسٹریج کے علاقے مہر آباد میں 12 سالہ معذور طالب علم سے اسکول میں جنسی زیادتی کا گھناؤنا واقعہ پیش آیا ہے۔‌ویسٹریج پولیس نے خصوصی بچے کی والدہ کی درخواست پر اسکول انتظامیہ اور اسکول کی پک اینڈ ڈراپ سروس کے ڈرائیور محمد شہزاد ولد نور الہی کے خلاف مقدمہ درج کرلیا۔‌ملزم کا اپنے محلے میں بھی بچوں کو ڈرا دھمکا کر ان کا جنسی استحصال کرنے کا انکشاف ہوا ہے۔‌خصوصی بچے کی والدہ نے بتایا کہ 12 سالہ بیٹا اسپیشل چائلڈ ہے، جو اسپیشل بچوں کے اسکول حسن اکیڈمی میں پڑھتا ہے، بیٹا اسکول سے واپس آیا تو بتایا کہ وین کے ڈرائیور نے اسکول میں جنسی زیادتی کا نشانہ بنایا، حسن اکیڈمی اسکول انتظامیہ اور ڈرائیور کے خلاف قانونی کاروائی کی جائے۔‌ایس ایچ او ویسٹریج زاہد ظہور کا کہنا ہے کہ مقدمہ درج کرکے شہزاد نامی ملزم کو گرفتار کرلیا گیا، بچے کا میڈیکل بھی کرالیاگیا ۔ ملزم کو قرار واقعی سزا دلانے کے تمام قانونی تقاضے پورے کیے جائیں گے۔