نئی دہلی: بالی ووڈ ہدایتکار انیل شرما نے تارا سنگھ اور سکینہ کی محبت کی کہانی کو پسند کرنے والے مداحوں کو خوشخبری سُناتے ہوئے فلم ‘غدر 3′ کی تیاری کا اعلان کردیا۔ بھارتی میڈیا کے مطابق ہدایتکار انیل شرما نے فلم ‘غدر 3′ کی تصدیق کرتے ہوئے کہا کہ سنی دیول نے فلم کے ستاویزات پر دستخط کرلیے ہیں، اس طرح فلم کی کاغذی کارروائی کا پہلا مرحلہ مکمل ہو چکا ہے۔ انیل شرما نے اپنے بیان میں کہا کہ وہ ان دنوں نانا پاٹیکر کے ساتھ فلم کی شوٹنگ میں مصروف ہیں، اس فلم کی شوٹنگ سے فارغ ہونے کے بعد وہ ‘غدر 3′ کی اسکرپٹ پر کام کریں گے۔ ہدایتکار نے مزید کہا کہ اُنہوں نے اپنی ٹیم کے ساتھ ملکر کچھ منصوبے تیار کیے ہیں، سب بیٹھ کر فلم کی کہانی کو فائنل کریں گے اور پھر کام کا آغاز کریں گے۔ رپورٹ میں یہ بھی کہا گیا ہے کہ اگر سب کچھ منصوبہ بندی کے مطابق ہوتا ہے تو فلم ‘غدر 3′ سال 2025 کے آخر تک ریلیز کی جائے گی۔ واضح رہے کہ سال 2023 میں سنی دیول اور امیشا پٹیل کی سُپر ہٹ فلم ‘غدر 2′ ریلیز ہوئی تھی جس نے پوری دُنیا سے مجموعی طور پر 1000 کروڑ روپے سے زیادہ کا بزنس کیا تھا۔ سنی دیول کو فلم کی بلاک بسٹر کامیابی کے بعد متعدد پروجیکٹ آفر ہوئے تھے، اب وہ اپنی نئی فلمیں ‘سفر’، ‘لاہور 1947′ اور ‘باپ’ کی شوٹنگ میں مصروف اور ریلیز کے منتظر ہیں۔
