لاہور: مسلم لیگ (ن) کی چیف آرگنائزر مریم نواز نے کہا ہے کہ نواز شریف صبح شام اس پر کام کررہے ہیں کہ منتخب ہونے پر بجلی کا بل کیسے کم کرنا ہے۔لاہور سے قومی اسمبلی کے حلقہ این اے 119 میں جلسے سے خطاب کرتے ہوئے مریم نواز نے کہا کہ ن لیگ کے سوا باقی جماعتوں نے کچھ نہ کیا، ان کا کام صرف تنقید کرنا اور الزامات لگانا ہے، میں نوازشریف کے پندرہ سو منصوبے گنوا سکتی ہوں، لیکن ایک صوبے میں ایک جماعت کی پندرہ سال سے حکومت ہے، وہ اپنے صرف 15 منصوبے ہی گنوادے۔ان کا کہنا تھا کہ ماضی میں مجھے اپنے والد کا ساتھ دینے کی سزا دی گئی، مجھ پر صرف یہ الزام تھا کہ باپ کیساتھ کھڑی کیوں ہوئی، چاہے جان چلی جاتی، کرسی چلی جاتی لیکن میں اپنے باپ کیساتھ کھڑی رہی، پنجاب کے عوام نواز شریف پر تنقید برداشت نہیں کرتے۔انہوں نے کہا کہ نواز شریف صبح شام اس پر کام کررہے ہیں کہ منتخب ہونے کے بعد بجلی کا بل کیسے کم کرنا ہے، اللہ کا واسطہ سوچ سمجھ کر ووٹ ڈالنا، کیونکہ اس نے ہماری نسلوں کا فیصلہ کرنا ہے، ہم نے یہ ملک چھوڑ کر کہیں نہیں جانا، میرے بچے یہیں رہیں گے۔
