لاہور: افغانستان کے خلاف سیریز کے لیے مجوزہ ٹیم میں آج کئی سرپرائز متوقع ہیں۔ افغانستان کے خلاف شارجہ میں شیڈول 3 ٹی ٹوئنٹی میچز کی سیریز کے لیے پی سی بی مینجمنٹ کمیٹی کے سربراہ نجم سیٹھی کی منظوری کے بعد پاکستانی ٹیم کا اعلان آج ہوگا، چیف سلیکٹر ہارون رشید قذافی اسٹیڈیم لاہور میں پریس کانفرنس میں ناموں کا اعلان کریں گے. اس سیریز میں سابق کپتان محمدیوسف عبوری ہیڈکوچ کی ذمہ داریاں نبھائیں گے، ٹیم مینجر کے طورپر منصور رانا کو برقرار رکھا گیا ہے، فیلڈنگ کوچ عبدالمجید ہوں گے۔ سپورٹ اسٹاف کی تعداد کو اس سیریز کے لیے کم رکھنے کا بھی فیصلہ کیا گیا ہے۔ قومی ٹیم 21اور 22 مارچ کو شارجہ کیلیے اڑان بھرے گی۔ ذرائع کے مطابق مجوزہ ٹیم میں کئی سرپرائز متوقع ہیں، سلیکشن کمیٹی سینئرز کی جگہ پی ایس ایل کے پرفارمرز کو موقع دینے کے حق میں ہے۔
