ممبئی: دین اسلام کیلئے 2019 میں شوبز انڈسٹری چھوڑنے والی اداکارہ زائرہ وسیم نقاب میں کھانا کھانے والی خواتین کی حمایت کیلئے سامنے آئی ہیں۔ ٹویٹر پر ایک صارف نے اپنی ٹویٹ میں ایک تصویر شیئر کی ہے جس میں ایک خاتون نقاب کے ساتھ کھانا کھا رہی ہے اور ساتھ ہی نقاب پر طنز کرتے ہوئے کیپشن دیا کیا یہ کسی انسان کا انتخاب ہے؟۔ زائرہ وسیم نے اس ٹویٹ پر اپنا ردعمل دیتے ہوئے لکھا کہ انہوں نے بھی اسی طرح شادی میں شرکت کی ہے اور اسی طرح کھایا ہے اور یہ ان کی مکمل طور پر اپنی چوائس تھی۔ انہوں نے مزید لکھا میرے ارد گرد کے لوگوں نے مجھے نقاب اتارنے کیلئے اشارے کیلئے لیکن میں نے نقاب نہیں اتارا اور یہ نقاب ہم آپ لوگوں کیلئے نہیں کرتے۔ واضح رہے کہ زائرہ وسیم نے اپنے شوبز کیریئر کا آغاز سپر اسٹار عامر خان کی فلم دنگل سے کیا تھا اور انہوں نے سیکرٹ سپر اسٹار میں بھی عامر کے ساتھ کام کیا جس سے انہیں دنیا بھر میں شہرت ملی۔
